XIRDALANDA YENİ PARK TİKİLİR

"Şəhərin ümumi inkişaf planına uyğun olaraq aparılan abadlıq-quruculuq işləri hazırda da davam etdirilir, bundan sonra da qarşıda duran vəzifələr uğurla icra ediləcək". Bu sözləri xirdalanbelediyyesi.az saytına verdiyi açıqlamada ölkəmizin beşinci böyük yerliözünüidarəetmə orqanı olan Xırdalan Bələdiyyəsinin sədri Eldar Əhmədov bildirib. Onun sözlərinə görə hazırda Xırdalan dairəsinin yaxınlığındakı geniş ərazidə müasir tələblərə uyğun park salınır:"Cənab Zakir Fərəcovun rəhbərliyi altında Abşeron rayonunda, xüsusi ilə də onun mərkəzi Xırdalan şəhərində bütün sahələr üzrə inkişafa nail olmaq üçün icra və yerliözünüidarəetmə orqanları böyük səy göstərirlər. Məlum olduğu kimi son 5-6 ilədək Xırdalan ölkənin çoxsaylı qəsəbələrindən biri idi. Ancaq əhalinin çoxsaylı artımı ilə əlaqədar olaraq 2006-cı ildən şəhər statsusu verilən Xırdalanda hazırda yüzminə yaxın sakin yaşayır. Şübhəsiz ki, bu rəqəm bizim qarşımızda insanların digər sahələr kimi istirahət etmək hüququnun da təminatı üçün daha böyük miqyaslı işlər görməyi bir vəzifə kimi qoyur. Hazırda tikilməkdə olan yeni park şəhərimizin Bakı-Sumqayıt yolu şosesinin yaxınlığındakı sahəsində yerləşir. Parkda müxtəlif ağac və gül kolları əkilir, eyni zamanda müasir işıqlandırma sistemi qurulur, sakinlər istirahəti üçün rahat oturacaqlar quraşdırılır və digər zəruri abadlıq işləri aparılır. Hava şəraiti ilə bağlı olaraq aparılan işlərdə müəyyən fasilələr olsa da ümüd edirəm ki, yaz aylarında park sakinlərin istifadəsinə veriləcək".